Con nos ta financia?

CEDE Aruba por yuda bo den e siguiente 6 areanan di trabao cu financiamento di un proyecto:

  • Bario & comunidad
  • Individuo & famia
  • Mucha & hoben
  • Hende di edad & hende cu limitacion
  • Grupo vulnerabel
  • Fortificacion di NGO

Si bo ta desea di sa mas di nos areanan di trabao, click anto aki prome.

Cerca CEDE Aruba bo por entrega peticion pa diferente budget, cual nan ta:

  • Peticion regular pa proyecto
  • Centro di bario
  • Iniciativa di bario
  • Vakantiekamp

Financiamento regular di proyecto

Prome cu bo cuminsa traha un peticion regular di proyecto y entrega esaki, semper ta bon pa traha un cita orientador. CEDE Aruba ta traha cu diferente fondo den exterior. Posiblemente bo proyecto tin oportunidad pa haya financiamento di otro fondo. CEDE Aruba lo mira bon hunto cu bo kico ta e miho maneho y cual procedemento mester sigui. CEDE Aruba ta financia anualmente proyecto grandi y chikito riba e diferente areanan di trabao. Si bo ta prefera pa lesa prome tocante e areanan di trabao, anto click aki. Si bo ta desea di sa mas encuanto e posibilidad cerca Samenwerkende Fondsen Caribisch Deel van het Koninkrijk, anto nos ta referibo na: www.samenwerkendefondsen.org. Atencion: mester entrega tur peticion pa Samenwerkende Fondsen cerca CEDE Aruba.

Si bo a crea un bon proyecto y bo ta pensa cu bo ta bin na remarke pa co-financiamento, bo por entrega un peticion cerca CEDE Aruba. Un peticion completo ta consisti di:

  • Un formulario di peticion pa proyecto (download aki)
  • opcional: un projectdossier di bo organisacion
  • un extracto reciente di Camara di Comercio
  • statuutnan di bo organisacion
  • Un relato anual financiero reciente di e ultimo aña economico
  • Rekisito specifico pa cada proyecto (consulta mas aleu)

E formulario pa peticion pa financiamento regular di proyecto bo por download aki.

Formulario di Peticion

E duracion pa tratamento di e financiamento regular di proyecto ta entre 6-8 siman despues di fecha di entrega.

E condicionnan general cu ta relaciona cu Financiamento Regular di Proyecto bo por download aki den PDF.

Condicionnan General

Centro di Bario

Si bo ta envolvi den un centro di bario/organisacion di bario y ta busca financiamento pa parti di e programa anual of pa actividad separa anto bo por haci uzo di e peticion pa Centro di Bario. Si bo no a cera conoci ainda cu CEDE Aruba anto ta deseabel pa un conversacion orientador tuma lugar prome. Por fabor traha un cita pa esaki.

En caso cu bo ta desea di entrega un peticion pa Centro di Bario, anto bo mester entrega un ‘Formulario pa Peticion Centro di Bario’ completamente yena. E formulario pa peticion bo por download aki.

Formulario Pa Peticion

E duracion di e proceso di e peticion Centro di Bario ta maximo 1 siman despues di e fecha di entrega.

Atencion: Si bo ta desea di entrega un programa anual completo anto bo mester haci uzo di e procedemento “Financiamento Regular di Proyecto”.

Iniciativa di Bario

Si bo ta envolvi den un iniciativa di bario y/o grupo di habitante y ta desea di organisa actividad pa bo bario, anto bo por haci uzo di e peticion Iniciativa di Bario. Si bo no a cera conoci ainda cu CEDE Aruba anto ta deseabel pa un conversacion orientador tuma lugar prome. Por fabor traha un cita pa esaki.

En caso cu bo ta desea di entrega un peticion pa Iniciativa di Bario, anto bo mester entrega un ‘Formulario pa Peticion Fondo Iniciativa di Bario’ completamente yena. E formulario pa peticion di Iniciativa di Bario bo por download aki.

Formulario Pa Peticion

E duracion di e proceso di e peticion Iniciativa di Bario ta maximo 1 siman despues di e fecha di entrega.

Vakantiekampen

Si bo ta desea di organisa un vakantiekamp pa mucha y/o hoben bo por bin na remarca pa e peticion Vakantiekamp. Si bo no a cera conoci ainda cu CEDE Aruba anto ta deseabel pa un conversacion orientador tuma lugar prome. Por fabor traha un cita pa esaki.

Un peticion completo ta consisti di:

  • un programa extenso di campamento
  • un presupuesto transparente
  • lista di e boluntarionan cu lo ta envolvi durante e campamento

Atencion: CEDE Aruba ta spera di bo boluntarionan cu nan tin experiencia cu tene campamento. Por ta cu ta pidi bo pa demostra e experiencia di bo boluntarionan. Tambe CEDE Aruba hunto cu ATHA ta organisa regularmente curso pa lider di campamento dentro di e proyecto VIBES 4 YOUTH. Ta posibel cu CEDE Aruba ta pone participacion di bo lidernan di campamento como condicion pa por haya financiamento.

E duracion di e proceso di e peticion Vakantiekamp ta maximo 2 siman despues di e fecha di entrega.

Procedemento di Evaluacion

Despues cu bo a yena y entrega e ‘formulario pa peticion’ corespondiente, ta sigui e proceso di evaluacion. Nos a evalua bo peticion aplicando e siguiente criterionan.

  • E proyecto ta relevante y urgente, e proyecto ta den area di trabao di CEDE Aruba y e proyecto ta urgentemente necesario?
  • E proyecto ta structural of incidental, e proyecto ta sostenibel of e tin efecto un biaha so?
  • Tin un base di apoyo pa e proyecto, tin suficiente sosten y interes for di e grupo meta y comunidad pa e proyecto?
  • E caracter di e proyecto ta dentro di e area di trabao di CEDE Aruba?
  • Tin algun riesgo pa cu realisacion, e probabilidad ta grandi cu e proyecto no ta keda realisa y no tin efecto?
  • E presupuesto pa e proyecto ta na ordo y transparente?

Ta evalua bo peticion segun e seis criterionan aki, despues ta sigui e tuma di decision. Si ta aproba e peticion anto bo ta ricibi un carta di aprobacion cu informacion tocante e manera con bo mester responsabilisa e aporte. Banda di esey den e carta di aprobacion por tin condicion mara na e financiamento. E directiva di e organisacion mester firma e carta di aprobacion di manera legal pa duna acuerdo. Den caso cu e proyecto keda rechasa bo ta haya un carta di rechaso.

Proyecto aproba: anto kico?

Si e peticion di proyecto keda aproba ta cuminsa e fase di ehecucion di e proyecto. Oficina di CEDE Aruba ta traha hunto cu bo acuerdo cla tocante ehecucion, monitoreo, evaluacion y cuenta final di e proyecto.