Programa di estimulo

Na 2013 CEDE Aruba a haci un inventarisacion di necesidad  den e 9 centronan di bario di Aruba:  CB Noord, CB Tanki Lender, CB Piedra Plat, CB Playa Pabou, CB Dakota, CB Ayo, CB Savaneta, CB Brazil en CB Lago Heights. For di e inventarisacion a resulta cu e 9 centronan di bario mester apoyo structural den haya boluntario nobo, skirbi programa anual y haci contacto cu organisacionnan nacional. E punto di salida ta cu tin actividad orienta riba tur grupo meta dentro di e bario: mucha, hoben, adulto y hende de edad. Banda di esey hopi apoyo ta necesario riba tereno di gerencia, entre otro personal, mercadeo, administracion y recaudacion di fondo. Ta pesey CEDE Aruba a tuma paso na 2014 pa funda e organisacion di estimulo MOBIS. Desde 2015 MOBIS ta opera y ta apoya e Centronan di Bario riba tereno di e puntonan menciona ariba. MOBIS por lo pronto ta financia pa CEDE Aruba y   Samenwerkende Fondsen Caribisch Deel van het Koninkrijk.

Na 2015 CEDE Aruba a trece un cantidad di  organisacion hunto pa inicia un campaña educativo dirigi na sosten pa esnan cu ta duna cuido no profesional. E organisacionnan cu tabata envolvi tabata: SABA, Wit Gele Kruis, Dr. Horacio Oduber Hospital y Cas Marie. Di e conversacionnan a sali na prome instante un plan pa un proyecto di tres aña. E plan aki ta orienta riba informacion segun bario pa dunado di cuido no profesional, informacion y promocion di experticio digital online pa como 200 profesional cu tin contacto cu dunado di cuido no profesional. E plan aki ta ser ehecuta den estrecho colaboracion cu e Platform Ouderenzorg (Plataforma pa Cuido di Persona di Edad). E Platform Ouderenzorg ta orienta riba cera buraco dentro di cuido y pensa riba ruta pa cuido pa diferente grupo meta di persona di edad.

Na 2014 CEDE Aruba a tuma iniciativa pa trece un cantidad di organisacion hunto cu ta desea di tuma accion pa laga hende cu limitacion participa den proceso laboral of den trabao boluntario. E organisacionnan aki tabata: SVGA, FAVI, FEPO, Sonrisa, Trampolin pa Trabou, Directie Sociale Zaken, Directie Arbeid y Medwork. Asina a surgi un proyecto grandi: “Kitando Barera y Creando Oportunidad”.  Esaki ta un proyecto di tres aña dirigi na guia pa yega na trabao pa hende cu un limitacion. E proyecto aki ta financia pa CEDE Aruba y Samenwerkende Fondsen Caribisch Deel van het Koninkrijk. Desde cu e proyecto a cuminsa a lanta tambe un comision nacional den cual e organisacionnan menciona ariba ta participa. E meta di esaki ta pa elabora e proceso di guia pa yega na trabao completamente y haci esaki mas transparente.

Desde 2013 CEDE Aruba ta coordina e plataforma CEMBRAH. Akiden diferente organisacion ta participa cu ta envolvi cu mayor teenager. E organisacionnan ta:  Wit Gele Kruis, Directie Sociale Zaken, diferente trahador social di scol y Casa Cuna Progreso. E prome paso tabata pa documenta e ayudo na mayor teenager miho. Esaki a keda finalisa na mita di 2015 y a base di esey a realisa financiamento pa un consultor nobo pa mama teenager na Wit Gele Kruis. Durante 2015 y 2016 a traha tambe riba prioridad den maneho y di proyecto. Esakinan ta entre otro e set up di un ayudo pa mama teenager na Casa Cuna Progreso, programa di mentor pa mayor teenager, e expansion di diferente grupo di sosten pa mama teenager, educacion sexual den enseñansa y enseñansa di segundo oportunidad pa mama teenager. Lo desaroya e proyectonan aki dentro di e tres siguiente aña.

Na november 2015  a lanta e plataforma di colaboracion FUNDECO. FUNDECO ta para pa “Fundacionnan den Cooperacion”. CEDE Aruba a facilita henter e trayecto preliminar. E colaboracion cu e 21 fundacionnan envolvi ta regla via un convenio di colaboracion. E prioridadnan ta pa promove mas colaboracion structural entre e diferente fundacionnan, crea un modelo di financiamento nobo y efectivo pa e fundacionnan y pa haci un contribucion na un dialogo nacional encuanto problematica di cuido y ayudo na Aruba. Desde november 2015 FUNDECO ta dirigi pa un ‘stuurgroep’, consistiendo di miembro di directiva di e diferente fundacionnan. CEDE Aruba ta keda conseha riba peticion y riba propio iniciativa. E prome prioridadnan ta colabora den e modelo pa subsidio nobo, introduccion di un sistematica nobo pa finalisa cuenta pa e fundacionnan, calculacion di costo pa e fundacionnan y economisa den gasto colectivamente pa reduci gasto operacional. Banda di esey lo duna atencion na dirigi efectivamente y na maneho financiero.

Banda di CEDE Aruba, Samenwerkende Fondsen Caribisch Deel van het Koninkrijk tambe ta tuma iniciativa na Aruba y e otro islanan dentro di Reino. Dos iniciativa grandi ta e programa ‘Kansen voor Jongeren’ y e programa ‘Samen Oud’. Pa e programa Kansen voor Jongeren e fondonan a selecta 18 iniciativa cu ta apoya hoben vulnerabel den edad di 12-25 aña den nan desaroyo. E meta ta pa yuda hoben, tanto riba tereno social-emocional como cu nan carera (escolar), asina cu mas tanto posibel nan por biba economicamente independiente. Den e programa Samen Oud e fondonan ta apoya proyecto dirigi na persona di edad, dunado di cuido no profesional y boluntario cu ta colabora cu persona di edad. Puntonan di atencion ta entre otro encuentro (ripiti), programa di actividad, proyecto di informacion den colaboracion cu profesional y proyecto nobo di cas di cuido y di cuido medico, dirigi na actividad cu ta ripiti/structural cu habitante di bario. Dentro di Samen Oud actualmente tin 7 proyecto andando na Aruba.