Centro pa Desaroyo di Aruba (CEDE Aruba) y Aruba Timeshare Association (ATSA) recientemente a firma un acuerdo conhuntamente pa e ‘Happy Community Initiative’, un esfuerso colectivo entre CEDE Aruba, ATSA y su miembronan pa asina recauda fondo den e sector di turismo.
Na 2017, CEDE Aruba a duna presentacion na ATSA, pa demostra e problemanan social den e comunidad di Aruba y tambe e innovacion den e mundo di recauda fondo, esta ‘fundraising’. Despues di a completa un encuesta entre e doñonan di timeshare, cual a sali positivo, CEDE Aruba y ATSA a desaroya un strategia pa asina invita e doñonan di timeshare y bishitantenan di Aruba pa por apoya e iniciativanan pa comunidad, door di haci donacion na esaki y tambe ora ta asina leu, pa por bira voluntario di proyectonan. E donacion di bishitantenan lo wordo maneha door di CEDE Aruba y lo wordo inverti den proyectonan cu lo haci un impacto riba desaroyo di mucha y hobennan na Aruba, entre otro programanan pa despues di scol, actividad durante vakantie y proyectonan dedica na hubentud vulnerabel.
E firmamento di e acuerdo a tuma lugar na e oficina di CEDE Aruba. “Nos ta sumamente contento cu e colaboracion cu CEDE Aruba pa asina por duna mas sosten y apoyo na nos hubentud & famianan y haci un impacto mas grandi riba e futuro di nos comunidad” segun Mr. Luigi Heredia, Presidente di ATSA
E directiva di CEDE Aruba ta reconoce e acuerdo aki como un logro masha importante y grandi; e sector social y e sector turistico ta creciendo hunto pa asina por cosecha un desaroyo social y sostenibel.
Aruba Timeshare Association (ATSA) ta e entidad legal representando e interes special di timeshare na Aruba su sector turistico, ATSA a wordo estableci na 1994, y actualmente ta sostene e mayoria miembrecianan activo di propiedad di timeshare na Aruba (tambe pa asociacion co-op di condominio)
E Asociacion ta traha riba un nivel local, como un miembro di sosten pa AHATA, e Aruba Hotel and Tourism Association, y cu otro organisacion local y tambe entidad di Gobierno. Riba un nivel regional unda Aruba ta continua di ricibi reconocemento como destino di timeshare ehemplar, ATSA tin enlace profesional cu CHA, e Caribbean Hotel Association y tambe ta beneficio di un colaboracion continua cu ARDA, e American Resort Development Association. Bishita nos online na http://www.arubatsa.com/
CEDE Aruba ta stimula pa trece hende y medio hunto pa tin un desaroyo sostenibel. Den e lucha contra problema socio-economico y social na Aruba, nos ta trece organisacionnan y gruponan den contacto cu otro, cu por fortifica otro y unda tin posibilidad pa desaroyo social-educativo. Nos ta contribui na un comunidad unda hende di tur edad y clase social por desaroya nan mes. Nos ta kere cu desaroyo sostenibel den comunidad Arubano ta factibel. Bishita nos online na http://cedearuba.org/
Pa mas informacion tocante e Happy Community Initiative, por tuma contacto cu:
Kimberly Mathilda, Coordinador di e Proyecto Happy Community Initiative Aruba
Telefon: +297 582.7666
Email: [email protected]
