News

Lansamento di proyecto PITCH TIME

By May 21, 2019 No Comments

Diaranzon, 13 di februari 2019, den e cantina di WEB Aruba N.V., CEDE Aruba a lanza e programa y competencia PITCH TIME, un iniciativa pa hoben cu kier bira boluntario of forma parti di un organisacion social y haci impacto na Aruba. E programa PITCH TIME ta ricibi sosten financiero di WEB Aruba N.V., Aruba Bank N.V., De Palm Tours N.V., Marriott Aruba, Marriott Care Foundation, Aruba Airport Authority N.V., Aruba Tourism Authority y Vertegenwoordiging van Nederland in Aruba (VNO). WEB Aruba N.V. ta e sponsor principal.

Hoben na Aruba kier participa den trabou boluntario, pero no tur ora ta haña un oportunidad. CEDE Aruba kier crea un coneccion entre hobennan, organisacion social y companianan local. E programa PITCH TIME ta crea un manera nobo pa hoben por participa y siña abilidadnan ariba tereno di proyecto social. E programa ta tuma lugar den e periodo di februari te september 2019 y ta consisti di diferente fase.

Den luna di januari 2019, varios fundacion a presenta un proyecto of idea pa cu lo mester haci un impacto positivo riba e gruponan vulnerable den nos comunidad. E fundacionnan cu a drenta den e competencia di PITCH TIME ta: Cacique Macuarima Scouting, Casa Cuna Progreso, Centro di Bario Brazil, Centro di Bario Tanki Lendert, Centro Famia Piedra Plat, Centro Familiar Sabana Basora Noord, FADA, Fundacion pa nos Comunidad, FAVI, Heart Centered leadership Foundation, Scubble Bubble, YMCA, Fundacion Respetami, Fundacion Paso pa Paso Aruba y Mary Joan Foundation.

E 15 mihor proyecto of idea a wordo selecta pa drenta den e competencia di PITCH TIME. E proyectonan inicial por wordo mira online ariba e website: www.pitchtimearuba.com Cada fundacion cu a drenta den e competencia lo traha hunto cu un youth coach y lo mester recruta un team di minimo 5 y maximo 10 hoben cu mester ta envolvi den e proyecto.  Durante e luna di maart lo organisa e PITCH TIME ACADEMY, na unda hoben lo ricibi curso tocante entrepreneurship, public speaking, project management, team building y con pa duna un pitch. Asina nan lo prepara nan PITCH pa e proyecto.

Na april 2019, durante e PITCH TIME EVENT, tur fundacion y nan team di hoben boluntario lo mester PITCH nan proyecto dilanti e sponsors. Na final di e PITCH TIME EVENT, e sponsors lo escohe pa nan proyecto, cada un cu un balor averahe di AWG. 15.000,-. 10 proyecto por haya financiamento. E teamnan cu a gana lo bai den e ehecucion di e proyecto y lo presenta nan resultado na september 2019 durante e PITCH TIME SHOWCASE, unda esaki lo bira un anochi bunita cu testimonio di NGO’s, hobennan y companianan. E famia di e hobennan y tur fundacion y sponsors ta invita pa celebra e gran final di PITCH TIME.

CEDE Aruba ta gradici tur sponsor pa nan contribucion. Si tin hoben y/of companianan interesa pa participa, por tuma contacto cu CEDE Aruba na 582-7666 of [email protected]. Pa mas informacion, por bishita www.pitchtimearuba.com y bishita nos ariba facebook na PITCH TIME ARUBA.