Awe a cuminsa e prome training di Signs of Safety pa henter e sector social na Aruba.

‘Signs of Safety’ un training desaroya na Australia y cu conoce gran aceptacion y cu bon resultado riba e tema di proteccion di mucha a start awe 1 di april pa prome biaha na Aruba. E mainta a cuminsa cu un palabra di entre otro Prome Minister Evelyn Wever-Croes, Minister di Asunto Social y Labor Glenbert Croes y Daniel Tecklenborg di CEDE Aruba.

‘Signs of Safety’ ta un iniciativa di Bureau Sostenemi conhuntamente cu Wit Gele Kruis. Banda di esaki, Fundacion Respetami a contribui grandi den e planificacion di esaki. E projecto ta wordo financia pa CEDE Aruba conhuntamente cu Gobierno di Aruba. E proyecto ta conta cu un total di 134 participante cu no solamente ta profesionalnan cu ta traha riba tereno social pero tambe den enseñansa, husticia y salubridad.

‘Signs of Safety’ a ser implementa na Estados Unidos, Europa y Asia. E training ‘Signs of Safety’ ta diseña specificamente pa proteccion di mucha y ta diseña door di profesionalnan riba e tereno social pa asina por aplica e miho tecnicanan pa e casonan mas dificil pa loke ta trata proteccion di muchanan den caso di abuso.

Un palabra di EXITO na tur participante cu e training di ‘Signs of Safety’.