News

Trabao boluntario na Europa via Erasmus+ ta yuda hoben crece

By May 21, 2019 No Comments

Recientemente, 2 boluntario hoben a regresa di nan estadia di 2 luna na Spaña, na unda nan a traha cu mucha cu limitacion mental. E periodo di trabao boluntario aki a wordo organisa dor di CEDE Aruba, cu subsidio di Erasmus+.

Erasmus+ ta un programa di subsidio pa educacion, formacion, hubentud y deporte na Europa. E ta duna hoben y esunnan cu ta traha cu hoben e oportunidad pa studia afo, adkiri mas experiencia den trabao of haci trabao boluntario. Meta di e programa ta pa brinda mas hende posibel e oportunidad di por participa den sociedad y e mercado laboral, dor di desaroya uno su habilidadnan y competencianan tanto profesional como riba nivel personal.

Asina e programa ta contribui na desaroyo social y crecemento economico sostenibel, igualdad social y inclusion. E programa Erasmus+ ta dura te cu 2020 y ta duna diferente oportunidad, no solamente pa studiantenan. Pa motibo cu Aruba ta cai bao di Reino Hulandes, nos tambe por haci uzo di e subsidionan di Erasmus+.

Keilah Geerman (22) y Natalia Santana Noguera (21) a siña hopi y a experiencia un desoroyo personal y profesional grandi durante nan periodo na e organisacion Alba na Spanje. Tambe nan a laga un impresion excepcional pa Aruba, pa cual CEDE Aruba ta gradici nan.

Nan a habri porta pa mas oportunidad pa otro boluntarionan Arubano, cu ta bonbini pa bai traha na Alba pa 2 of 10 luna. Dentro di poco tambe lo tin oportunidad pa un forma di stage pa empleadonan profesional (job shadowing).

CEDE Aruba tambe ta enfocando pa amplia e cantidad di partners den Europa. E meta ta pa crea y ofrese posibilidadnan den difererente pais Europeo, entre otro trabao boluntario, intercambio di hoben y tambe ‘job shabowing’ pa profesionalnan cu ta traha cu hoben