Dialuna, 1 di juli 2019, CEDE Aruba, hunto cu Aruba Timeshare Association y sosteni pa Aruba Tourism Authority a lansa HAPPY COMMUNITY INITIATIVE, un plataforma na unda turista por haci un donacion na proyecto pa un bon causa na Aruba. E prioridad ta stipula pa proyectonan cu ta dedica na hubentud. Turistanan por haci un donacion via di e website www.happycommunityaruba.org, of por haci donacion usando e prome ‘donation kiosk’ digital den Caribe. E kiosk aki ta disponibel den diferente lobby di timeshare resorts. Banda di esaki, algun resorts lo ofrece e posibilidad pa haci un donacion ora turista ta checkout.
Miyones di hende rond mundo ta stima Aruba, ONE HAPPY ISLAND y nan cas leu for di cas! Turismo di Aruba a keda crece durante e añanan y ta bayendo positivo. Especialmente e bishitantenan di merca tin un amor grandi pa Aruba. Na e mesun moment, turismo tambe ta trece retonan pa islanan chikito manera Aruba. Por ehempel: 6 di 10 hoben entre 12-18 aña ta keda sin supervision despues di ora di scol, den hopi caso, pasobra e mayor(nan) ta traha. Banda di esaki, tin un percentahe di hoben cu no por viaha durante vacacion y cu falta programanan recreativo. Un otro reto ta cu 4 di 10 hoben no ta caba scol secundario, cual ta un problema grandi pa Aruba su economia y e industria di turismo.
E retonan ariba menciona ta e motibo cu CEDE Aruba a aserca Aruba Timeshare Association cu e proposicion pa crea un programa di recauda fondo. Hunto a inicia un investigacion bou di doñonan di timeshare. E resultado ta mustra cu tin interes pa haci donacion y tambe trabou boluntario durante nan tempo na Aruba. Na 2019, CEDE Aruba y Aruba Timeshare Association a firma un acuerdo di cooperacion. E acuerdo aki ta clarifica e papel di cada organisacion. CEDE Aruba lo maneha e donacionnan y lo selecta proyecto cu ta bin na remarca pa financiamento, mientras cu Aruba Timeshare Association lo motiva y facilita miembronan pa drenta den e programa. E responsabilidad di cada resort ta pa train nan personal pa asina informa nan ‘guests’ tocante e programa positivo aki. CEDE Aruba y Aruba Timeshare Association tambe lo trata di motiva otro hotelnan y partners pa forma parti den esaki.
Unda e donacionnan lo bai? Den un otro investigacion cu a wordo haci dor di CEDE Aruba y ATHA (Associacion di Trabou pa Hubentud Aruba) a resulta cu mas di 60% di nos hoben aki na Aruba’s pa pidi pa un programa despues di scol. Nan interes ta pa dedica mas na deporte, cushinamento, programa di arte y un lugar sigur pa topa amistad. Mas cu 50 organisacion local ta motiva y interesa pa contribui na un programa nacional despues di scol. E donacionnan pa HAPPY COMMUNITY INITIATIVE lo yuda pa cuminsa y mantene programanan despues di scol den cada bario cu un enfoke ariba huiswerk y varios actividad a base di interes di e hobennan. Banda di esaki, e donacionnan lo wordo usa pa sostene programanan vacacional y proyectonan cu ta reduci e cantidad di hoben cu ta sali for di enseñanza sin diploma.
CEDE Aruba lo percura cu 100% di tur donacion yega na proyectonan di calidad cu ta wordo ehecuta pa organisacionnan local. Lo percura pa midi resultado y mantene transparancia financiero. Asina tur turista cu ta haci un donacion por ta sigur cu su contribucion ta yega na e meta. CEDE Aruba ta un organisacion dinamico cu ta sostene NGO’s desde 1986. E organisacion ta promove cooperacion entre organizacion social den diferente sector. CEDE Aruba ta duna sosten financiero, ta yuda desaroya proyecto y ta trece organisacionnan hunto pa dialoga tocante strategia. Banda di esaki, CEDE Aruba tin un red cu fondonan internacional y cu experencia con pa traha den esaki.
E proyecto HAPPY COMMUNITY INITIATIVE tin un mesahe pa turistanan di Aruba: ONE HAPPY ISLAND – ONE ACT OF KINDNESS. Laga nos inspira bo pa conecta cu nos comunidad local. Laga nos construi un brug entre nos comunidad y nos turismo. Asina tur hende por yuda pa mantene nos hubentud felis y sano. Aruba Tourism Authority ta sostene e iniciativa aki pa dos motibo. Na prome instancia pasobra e enfoce ta ariba nos hubentud. E di dos motibo ta cu e bishitantenan di Aruba y tambe companianan cu ta bin ta interesa pa wordo involve den bon causanan den nos comunidad.
Pa mas informacion, por bishita www.happycommunityaruba.org of manda nos un e-mail na [email protected]. Companianan local cu ta interesa pa yuda nos yega na e bishitante di Aruba por yama tambe na CEDE Aruba, Tel. 582-7666 y pidi pa Sra. Kimberly Mathilda, e coordinadora di proyecto di HAPPY COMMUNITY INITIATIVE.
