CEDE Aruba ta apoya proyecto di organisacion individual. CEDE Aruba ta financia proyecto den 6 area di trabao. E costonan cu CEDE Aruba ta financia ta entre otro orienta riba renobacion di servicio, mantenemento y expansion di producto/servicio, promocion di experticio, traspaso di conocemento, ehecucion di actividad. Banda di esey CEDE Aruba ta financia di forma masha limita proyecto material. Criterio importante den e evaluacion di peticion ta: urgencia/relevancia. Base di apoyo/colaboracion, sostenibilidad, riesgo y transparencia di e presupuesto. Banda di esey CEDE Aruba ta spera un aportacion propio di e peticionario, esaki por ta den forma di placa, tempo o medio.
Financiamento di proyecto
Intermediacion pa cu fondo
CEDE Aruba ta cumpli un tarea como mediador y ‘matchmaker’. CEDE Aruba ta fungi entre otro como co-financista y asesor di Samenwerkende Fondsen Caribisch Deel van het Koninkrijk (SFC). Banda di esaki CEDE Aruba semper ta alerta pa otro fondo posiblemente interesante dentro di Reino. Asina ta surgi oportunidad pa haci miho uzo di fondo di desaroyo disponibel. Cu cada peticion CEDE Aruba ta evalua si por envolve otro fondo den e financiamento di un proyecto, mas tanto den forma di co-financiamento.
Budget di estimulo
CEDE Aruba tin tres budget di estimulo, cu ta pa centro di bario, grupo di bario y di accion, y pa vakantiekamp. E centronan di bario, grupo di bario y di accion por haci peticion pa actividad chikito y separa y/o pa cumpra material. E actividadnan mester ta orienta riba informacion encuanto salud, mehoracion di bario, accion di limpieza, workshop educativo riba tur tipo di tereno di bida, actividad orienta riba seguridad den bario y organisacion di evento chikito. E budget pa bario tin un procedemento simpel y di facil acceso. E budget pa vakantiekamp ta ser uza pa financia (parti di) e gastonan di vakantiekamp.
Programa y Accion
CEDE Aruba ta desea di inverti mas den constelacion di colaboracion valioso, pues no solamente proyecto di organisacion individual, pero den intervencion cu ta basa riba colaboracion entre organisacion. Pa esaki CEDE Aruba ta organisa programa den consulta cu diferente sector den area di operacion. Na e momento aki CEDE Aruba ta trahando cu e siguiente programanan:
- Combatimento di pobreza
- Cuido familiar
- Di edad y hunto (Samenwerkende Fondsen)
- Guia pa yega na trabao (Arbeidstoeleiding) pa persona cu limitacion
- Maneho coherente pa cu mayor teenager
- Oportunidad pa hoben (Samenwerkende Fondsen)
- Fortificacion di NGO (FUNDECO)
- Fortifica centro di bario
